للتحرش أسباب كتيييييييييييييييييير

كلنا عارفين الل بيحصل فى شوارعنا من معاكسات يومية وتحرش قد يصل لدرجة اللمس لجسد البنت أو المرأة.. حكاية المعاكسات والتحرشات دى مبدأتش فى بلادنا اليومين دول وبس .. لا دول موجودين من زماااان لكن بدأوا يظهروا ويكتروا اليومين دول أكتر من السنيين اللى فاتوا.. يمكن يكون فى أسباب فينا أدت لكدا::

فكرت فى شوية أسباب واللى عنده أسبا ب غيرها يقولها:

1_ هبدأ كلامى بالبنات واللبس اللى بيكشف أكتر ما بيغطى( عشان محدش من الولاد يسبق ويقول هم البنات السبب) ظنا من البنات إنهم بطريقة اللبس دى هيلقطوا عريس أول ما ينزلوا من بيوتهم لكن لو يعرفوا طريقة تفكير الولاد ازاى هم بيبصولهم على أنهم سلعة معدية من قدامهم وبيتفرجوا عليها وبسسسسس .. والميكب اللى بقى بزايدة أوى لدرجة ان ملامح البنت بتضييع وبتدى سن أكبر من سنها بكتير بالميكب اللى بتزوده عليها.. وخاصة وهى نازلة الجامعة لأن فى أفكار بيحشولها دماغها بيها قبل دخول الجامعة " انك لاتزم تصطادى عريس من جامعتك لإما هتعنسى" طبعا دا كله كلام فى الهوا

2_ التساهل فى طريقة تصرفات البنات مع زمايلهم فى الجامعة وانهم يسمحوا للولاد بالهزار بالايد واللمس ..دا بيدى انطباع للولد ان دا شىء عادى عند أغلب البنات..

3_ الاعلانات اللى بتستخدم البنات سواء فى التليفزيون أو الاعلانات اللى متعلقة على بوسترات فى الشوارع.. أيا كان المنتج المعلن عنه لازم يكون فى صورة بنت منوراه!!

4_ الدين اللى اتربينا على أنه مادة مهمشة مبتتضافش للمجموع وفضل فى دماغنا المفهوم دا لحد ما كبرنا وكبر معانا مفهوم ان الدين حاجة ثانوية فى حياتنا..

5_ الفراغ اللى بقى عند الشباب واللى بيدفعهم للتفكير الدائم فى الشهوات وكيفية إشباعها بالطريق الغلط والمعاكسات ومضايقات البنات فى الشوارع

6_ القنوات الفضائية والكليبات المفتوحة 24 ساعة واللى بيشفها الاطفال 24 ساعة لدرجة اقتناعهم بأن دا مش عيب ولا حرام وان دا العادى

7_ ضيق الحالة المادية وصعوبة الجواز لكن دا مش سبب قوى لأن فى ناس حتى متجوزيين وبيعاكسوا وبيتحرشوا دا سبب بيتحججوا بيه الشباب عشان يبرروا لنفسهم المعاكسات اللى بيعملوها..

8_ غياب الاب الصديق والام الصديقة.. زمان كان الاباء والامهات بيقعدوا يحكوا مع ولادهم وبناتهم ويعرفوا مشاكلهم ويكلموهم عن حياتهم ويعلموهم من خبراتهم وطبعا كلنا عارفين ان دا مبقاش موجود دلوقتى.. الاب بيدور على الفلوس والام كمان بتدور على الفلوس وفى الاخر هم معذورين عشان الحياة بقت غالية والاشيائ اللى كانت زمان من الكماليات أصبحت دلوقتى من الاساسيات اللى لازم يشتروها..

9_ الغياب الامنى فى الشوارع وخاصة فى الاماكن الزحمة وفى المناسباب

10_ السلبية اللى أصبت الكثير من الناس فلو واحد شاف بنت بتتعاكس أو حد بيتحرش بيها هيقول لنفسه وأنا مالى وهيمشى ويكمل يومه عادى خالص ولا كأن شىء حصل على الاطلاق..

11_تأكد الشباب إن مفيش عقوبة ليهم على التحرش أو المعاكسات ودا بيديهم الثقة انهم يستمروا فى التحرش

12_ نظرة الرجل للمرأة على أنها مجرد جسد أنثوى مهمته إشباع رغبات الرجل وفقط.. بغض النظر عن كونها إنسانة

13_ طريقة تربية الاهل للولد .. وخاصة لما يبدأ الولد فى النضج ويبدأ اهله يعرفوا أنه بيعاكس بنات وبيصاحب بنات وبيحب دى وبيسيب دى والاهل بيفرحوا وبيقول دا الولد كبر وبقى بيلعب بديله وبيضحكوا وبيقولوها بكل الفخر " دا البنات هتتجنن عليه" طيب وبناتكم يا أهالينا ياترى ترضوا أنهم يكونوا مكان بنات الناس اللى أولادكم بيعاكسوهم وبيصاحبوهم وبيعملوا معاهم علاقات محرمة؟؟؟

14_ إقتناع ولاد كتير إن طالما البنت لابسه ضيق يبق حلال له إنه يعاكسها